BOODSKAP VAN DIE HOOF
HTS Middelburg is opgewonde dat jy en jou ouers ons besondere skool oorweeg en hoop om julle te voorsien van al die inligting wat julle benodig om ‘n goeie besluit oor jou hoërskoolloopbaan te neem. Omdat ons by Rooies graag met gelukkige mense werk, is jou keuse vir ons uiters belangrik. Ons beloof om jou unieke potensiaal te ontdek en te ontwikkel – ons doen dit al reeds sedert 1927!
Oor die jare heen het ons bekend geraak daarvoor dat ons goed toegeruste en fyn gemanierde jongmense die wêreld instuur. Dit is iets wat skaars geraak het onder jong mense. Ons leerders word gevorm om hulle plek in die samelewing met nederige selfvertroue en trots te kan vol staan. Goeie maniere is die kenmerk van HTS Middelburg se leerders; hulle staan op as hulle groet, hulle help waar hulle kan, en hulle het respek vir hulself en hul medemens.
Natuurlik het die opvoeding van die jeug heelwat verander oor die laaste twee eeue – vandag plaas ons klem op die ontwikkeling van dieper denkvaardighede en ‘n sterk gemeenskapsin. Goeie outydse waardes van afgerondheid en respek bly egter altyd in die mode en altyd deel van HTS Middelburg. Jy kan ook deel wees van die besondere opvoedingsprogram.
Hoppie van Jaarsveldt
Hoof